Mac Rí Éireann le Caitríona Hastings agus Andrew Whitson.

Scór: 10/10 Leabhar iontach mealltach ó thaobh an scéil agus na healaíne de.

 Feiliúnach: 5 bliana (má léitear an leabhar dóibh) go  daoine fásta

Foilsithe: An tSnáthaid Mhór, 2010

 Leathanaigh: c. 52 leathanach

 Praghas: c. 18 euro

Mac Rí Éireann, le Caitríona Hastings agus Andrew Whitson

 Sárleabhar atá in Mac Rí Éireann le Caitríona Hastings agus Andrew Whitson. Athinsint ar scéal clúiteach béaloidis is ea é—tugann mac rí aghaidh ar an domhan thoir, maraíonn sé triúr fathach agus ollphéist, agus pósann sé iníon rí an cheantair. Don té a dhéanann staidéar ar an mbéaloideas, is ATU 300 (“Dragon Slayer”) é seo. Ós rud é go bhfuil athinsint Hastings dílis don bhunleagan, tá foiréigean agus troid fuilteach marfach sa scéal;an té nach bhfuil sásta an cineál sin ábhair a thabhairt do leanaí, ní thaitneoidh an leabhar seo leis.

 Tá friotal an leabhair an-saibhir agus an-nádúrtha. Cloíonn an athinsint le rithim traidisiúnta na scéalaíochta—déantar caithréimeanna cainte a aithris, mar shampla, nuair a bhuann an gaiscíoch ar gach fathach. Tabharfaidh an leabhar seo cleachtadh do pháistí ar stíl agus ar fhoclaíocht na scéalta béil. Tá blas Ultach ar Ghaeilge an leabhair—tá foirmeacha ar nós “ionsar” ann—ach ní chruthóidh an chanúint an iomarca deacrachtaí do pháistí a bhfuil canúint dhifriúil acu. Ó thaobh na stíle agus na canúna de, ní theastóidh ach cúpla focal a mhíniú do leanaí óga a bhfuil Gaeilge labhartha acu.

 Tá ealaín an leabhair chomh mealltach leis an athinsint féin. Tá lionn dorcha gruama ag baint le stíl na healaíne, a fheileann go maith don scéal ársa draíochtúil. Faigheann Whitson inspioráid ó chultacha cogaidh na Seapáine agus é ag tarraingt an domhain thoir. D’fhéadfadh cúpla pictiúr léitheoirí óga a scanrú, ach cuirfidh leanaí suim mór sna pictiúir ar fad (fiú na cinn is scanrúla) agus d’fhéadfaí cuid mhaith ama a chaitheamh ag breathnú ar phictiúir mhionoibrithe an leabhair. Ní léaráidí amháin atá in ealaíon an leabhair seo—is saothar ealaíne amach is amach é an leabhar.

 Ó thaobh an déanaimh de, tá caighdeán ard táirgeachta le sonrú go soiléir. Tá cludach crua, leathanaigh mhóra lán-daite (ar stíl dhorcha, dubh agus bán), ceangal láidir a choinneos na leathanaigh le chéile go deo, agus leabharmharc ribín. Is pléisiúr é an leabhar a bheith i do ghlac.

 Le cois an leabhair, faightear DVD ar a bhfuil Dónal Mac Giolla Chóil ag léamh an scéil a chomhuain is a bhíonn pictiúir chuí ón leabhar ag teacht ar an scáileán agus ag bogadh go mall. Ní fhéadfaí físeán a chur ar a leithéid, ach is breá le mo ghasúir a bheith ag breathnú air mar sin féin. Tá blas Conallach ar Ghaeilge Mhic Ghiolla Chóil a d’fhéadfadh deacrachtaí a chruthú do ghasúir na gcanúintí eile. Tuigeann mo ghasúr is sine Gaeilge Mhic Ghiolla Chóil gan deacracht, ach caithfidh an gasúr 3 bliana d’aois a ghabháil i dtuilleamaí “aistriúchán” go Gaeilge Chonnacht len í a thuiscint i gceart. Sin ráite, tá léamh iontach déanta ag Dónal Mac Giolla Chóil—ceist chanúna amháin atá ann, agus caithfidh na leanaí a ghabháil i gcleachtadh ar na canúintí ar fad ar ndóigh, só is cleachtadh maith é a bheith ag éisteacht le Gaeilge shoiléir Ultach Mhic Ghiolla Chóil.

 Go deimhin, tá mionfhadhbanna beaga ann. Tá an pictiúr ar an gclúdach istigh (sin é, an bhileog cheangail thosaigh nó “front endpaper”) iompaithe ar nós íomhá scannáin; dá bharr sin, ní féidir na seanbhoinn airgid Ghréagacha a léamh i gceart. Tá an pictiúr curtha mar is ceart, áfach, ar an mbileog cheangail chúil.

 Déanann Whitson aithris ar stíl ealaíne na Seapáine nuair a bhíonns an gaiscíoch sa “domhan thoir”. Ar ndóigh, shíl mé i gcónaí gur thagair “an domhan thoir” go príomha don mheán-oirthear agus don Ghréig, .i. do thíortha an Bhíobla. Athraíonn an stíl Sheapáineach ciall seo “an domhain thoir”, ach sílim go bhfeileann an tSeapáin go maith don scéal mar áit. Mar sin, níl a fhios agam an locht nó gaisce é an scéal a lonnú sa tSeapáin.

 Ar deireadh thiar thall, is leabhar iontach é Mac Rí Éireann a bheas na gasúir ag iarraidh a léamh arís agus arís eile. Is fiú go mór an leabhar a cheannach má táthar toilteanach glacadh leis an bhfoiréigean a bhíonns sna scéalta traidisiúnta.

Advertisements

Freagra

Líon amach do chuid faisnéise thíos nó cliceáil ar dheilbhín le logáil isteach:

Lógó WordPress.com

Is le do chuntas WordPress.com atá tú ag freagairt. Logáil Amach / Athrú )

Peictiúr Twitter

Is le do chuntas Twitter atá tú ag freagairt. Logáil Amach / Athrú )

Pictiúr Facebook

Is le do chuntas Facebook atá tú ag freagairt. Logáil Amach / Athrú )

Pictiúr Google+

Is le do chuntas Google+ atá tú ag freagairt. Logáil Amach / Athrú )

Ceangal le %s